Gaur egun, Israelek Gazako Zerrendan egiten ari den erasoaldiaren inpakturik suntsitzaileena hildakoak diren arren, urte eta erdiko indarkeria bortitzaren ondoren, ingurumen-krisi handi bat ere piztu da, herritarren osasunean zuzeneko ondorioak dituena . Zisjordanian, hainbat eskubide mugatuta daude okupazioaren ondorioz (hala nola edateko ura, energia eta elikadura eskuratzeko eskubidea), eta ingurumen-arazo larriak sortu dira, soroen kutsadura eta suntsipena tartean.

Zenbait erakundek inpaktu horiek «ekozidioa» direla diote; hots, ingurumena nahita kaltetzeko estrategia, krisi humanitarioa larriagotzearren eta, epe luzera, etorkizuneko bizitza eta herritarren osasuna mehatxatzearren.

Testuinguru horretan, emakumeak eta neskatilak bereziki kalteberak dira, eta, oinarrizko baliabideen gabezia dela eta, are larriagoa da jasaten duten diskriminazio-egoera.

Hala ere, askotan emakume horiek gizarte-aldaketaren buru dira, eta, beren lanari, konpromisoari eta ideiei esker, ingurumena babesten eta berdintasuna sustatzen duten irtenbide jasangarriak bultzatzen dituzte. Nolanahi ere, diskriminazio bikoitza jasaten dute, emakumeak izateagatik eta errefuxiatuak izateagatik. Beren lana betetzen dutenean ere arriskuan jartzen dute bizitza, eta generoan oinarritutako diskriminazioa jasaten dute.

Zailtasunak zailtasun, ahalegin guztiak egiten dituzte errealitate hori aldatzeko. Ildo horretan, emakumeen egoera hobetzeko eta, horrez gain, klimaren krisiari eta ingurumenaren degradazioari aurre egiteko ekimenak garatzen dituzte.

Ez dute amore ematen. Lurra eta, harekin batera, beren herriaren memoria eta etorkizuna lantzen jarraitzen dute.

Lurra defendatzen dute.